Gen 16 | NdeIBE | STEP | Kwathi uSarayi, umka-Abhrama kaze amzalela bantwana. Kodwa wayelencekukazi yomGibhithe eyayithiwa nguHagari;

Genesis 16

UHagari lo-Ishmayeli

1 Kwathi uSarayi, umka-Abhrama kaze amzalela bantwana. Kodwa wayelencekukazi yomGibhithe eyayithiwa nguHagari;

2 ngakho uSarayi wathi ku-Abhrama, “UJehova ungincitshile abantwana. Hamba, wembathe lencekukazi yami; mhlawumbe lami ngingaba lendlu ngaye.” U-Abhrama wavuma kulokho okwakutshiwo nguSarayi. 3 Yikho kwathi u-Abhrama esehlale eKhenani okweminyaka elitshumi, uSarayi umkakhe wathatha incekukazi yakhe yomGibhithe uHagari wamupha indoda yakhe ukuba ngumkayo. 4 U-Abhrama wamthatha uHagari wamupha isisu. Wathi esezibona eselesisu waseqalisa ukweyisa inkosikazi yakhe. 5 USarayi wasesithi ku-Abhrama, “Ngumlandu wakho ukuze ngihlupheke kangaka. Incekukazi yami ngayethula ezandleni zakho, kodwa ithi ngoba isisazi ukuthi isizithwele isingeyisa. Sengathi uJehova angehlulela phakathi kwami lawe.”

6 “Incekukazi yakho isezandleni zakho,” kusitsho u-Abhrama. “Yenza lokho obona kufanele ngayo.” USarayi wasemphatha kubi uHagari; yikho wabaleka kuye.

7 Ingilosi kaJehova yamfumana uHagari eduze komthombo enkangala; kwakungumthombo oseceleni kwendlela eya eShuri. 8 Yathi, “Hagari, ncekukazi kaSarayi, uvela ngaphi, uvele usiya ngaphi?” Waphendula wathi, “Ngibalekela inkosikazi yami, uSarayi.”

9 Yikho ingilosi kaJehova yamtshela yathi, “Buyela enkosikazini yakho ufike uyilalele.”

10 Ingilosi yengeza yathi, “Ngizakwandisa izizukulwane zakho zibe zinengi okungelakubalwa.”

11 Ingilosi kaJehova yaphinda yathi kuye: “Khathesi usukhulelwe uzazala indodana. Uzayibiza ngokuthi ngu-Ishmayeli, ngokuba uJehova usezwile ngokuhawula kwakho.

12 Uzakuba ngubabhemi ohlanyayo wendoda; isandla sakhe sizaxabana labantu bonke lesandla somuntu wonke sixabane laye, njalo uzaphila ngenzondano labafowabo bonke.”

13 UJehova owakhuluma laye wamutha lelibizo elithi: “UnguNkulunkulu ongibonayo,” ngokuba wathi, “Manje sengimbonile lowo ongibonayo.” 14 Yikho nje umthombo lowo wabizwa ngokuthi yiBheyeri Lahayi Royi; ulokhu usekhona, phakathi kweKhadeshi leBheredi.

15 Ngakho uHagari wazalela u-Abhrama indodana, u-Abhrama wamutha ibizo lokuthi ngu-Ishmayeli. 16 U-Abhrama wayeleminyaka yokuzalwa engamatshumi aficamibili lesithupha lapho uHagari emzalela u-Ishmayeli.